Su Kasidesi

Fahriye (Taç): 30. beyit 
Dua: 31-32. beyitler 
Nesib/Teşbib: 1 -15. beyitler 
Girizgah: 16. beyit 
Methiye: 17-29. beyitler 

 

KASİDE DER NA’T-İ HAZRET-İ NEBEVİ

Fâ’ilâtün/Fâ'ilâtün/Fâ’ilâtün/Fâ’ilün

  1. Saçma ey göz eşkden gönlümdeki odlara su
    Kim bu denlü dutuşan odlara kılmaz çâre su
     
  2. Âb-gûndur günbed-i devvâr rengi bilmezem
    Yâ muhit olmış gözümden günbed-i devvâra su
     
  3. Zevk-i tîğünden aceb yoh olsa gönlüm çâk çâk
    Kim mürûr ilen bırağur rahneler dîvâra su
     
  4. Vehm ilen söyler dil-i mecrûh peykânun sözin
    İhtiyât ilen içer her kimde olsa yara su
     
  5. Suya virsün bâğban gülzârı zahmet çekmesün
    Bir gül açılmaz yüzün tek virse min gülzâra su
     
  6. Ohşadabilmez gubârını muharrer hattuna
    Hâme tek bahmakdan inse gözlerine kara su
     
  7. Ârızun yâdiyle nemnâk olsa müjgânum n’ola
    Zâyi’ olmaz gül temennâsiyle virmek hâra su
     
  8. Gam güni itme dil-i bîmârdan tîğün diriğ
    Hayrdur virmek karangu gicede bîmâra su
     
  9. İste peykânun gönül hecrinde şevkum sakin it
    Susuzam bir kez bu sahrâda menümçün ara su
     
  10. Men lebün müştâkıyam zühhâd kevser talibi
    Nitekim meste mey içmek hoş gelür huşyâra su
     
  11. Ravza-i kûyuna her dem durmayup eyler güzâr
    Âşık olmış gâlibâ ol serv i hoş-reftâra su
     
  12. Su yolun ol kûydan toprağ olup dutsam gerek
    Çün rakîbümdür dahi ol kûya koyman vara su
     
  13. Dest-bûsı ârzûsıyla ger ölsem dostlar
    Kûze eylen toprağum sunun anunla yâra su
     
  14. Serv ser-keşlük kılur kumrî niyâzından meğer
    Dâmenin duta ayağına düşe yalvara su
     
  15. İçmek ister bülbülün kanın meğer bir reng ile
    Gül budağınun mizacına gire kurtara su
     
  16. Tînet-i pâkini rûşen kılmış ehl-i âleme
    İktidâ kılmış tarîk-i Ahmed-i Muhtâr’a su
     
  17. Seyyid-i nev’-i beşer deryâ-yı dürr-i ıstıfâ
    Kim sepüpdür mu’cizâtı âteş-i eşrâra su
     
  18. Kılmağ içün tâze gülzâr-ı nübüvvet revnakın
    Mu’cizinden eylemiş izhâr seng-i hâra su
     
  19. Mu’çizi bir bahri bî-pâyân imiş âlemde kim
    Yetmiş andan min min âteş-hâne-i küffâra su
     
  20. Hayret ilen barmağın dişler kim itse istimâ’
    Barmağından virdüği şiddet güni Ensâr'a su
     
  21. Dostı ger zehr-i mâr içse olur âb-ı hayât
    Hasmı su içse döner elbette zehr-i mâra su
     
  22. Eylemiş her katreden min bahr-i rahmet mevc-hîz
    El sunup urğaç vuzû’ içün gül-i ruhsâra su
     
  23. Hâk-i pâyine yetem dir ömrlerdür muttasıl
    Başını daşdan daşa urup gezer âvâre su
     
  24. Zerre zerre hâk-i dergâhına ister sala nûr
    Dönmez ol dergâhdan ger olsa pâre pâre su
     
  25. Zikr-i na’tün virdini derman bilür ehl-i hatâ
    Eyle kim def’-i humâr içün içer mey-hâre su
     
  26. Yâ Habîba’llâh yâ Hayre’l-beşer müştâkunam
    Eyle kim leb-teşneler yanup diler hemvâre su
     
  27. Sensen ol bahr-i kerâmet kim Şeb-i Mi’râcda
    Şebnem-i feyzün yetirmiş sâbit ü seyyâra su
     
  28. Çeşme-i hurşîdden her dem zülâl-i feyz iner
    Hacet olsa merkadün tecdîd iden mi’mâra su
     
  29. Bîm-i dûzah nâr-ı gam salmış dil-i sûzânuma
    Var ümidüm ebr-i ihsânun sepe ol nâra su
     
  30. Yümn-i na’tünden güher olmış Fuzûlî sözleri
    Ebr-i nisandan dönen tek lü’lü'-i şehvâra su
     
  31. Hâb-i gafletden olan bîdâr olanda Rûz-i Haşr
    Eşk-i hasretden tökende dîde-i bîdâra su
     
  32. Umduğum oldur ki Rûz-i Haşr mahrum olmayan
    Çeşme-i vaslum vire men teşne-i dîdâra su


Su Kasidesi